سمعت رأي عادل امام في الثورة؟
حسام حسن غير موقفه
وابراهيم حسن كمان
المشكلة مش في حسام أو ابراهيم
ولا تامر ولا عادل امام
المشكلة فينا احنا وفي وسائل اعلامنا،
احنا اللي عملنا ان الناس دي "نجوم المجتمع"
كدبة اخترعها الاعلام واحنا صدقناها،ودلوقت بنحاسبهم عليها،
اعتبرناهم قدوة واهتمينا بآرائهم في كل صغيرة وكبيرة في حياتنا
حتى رأيهم في نفسهم أخدناه منهم:ايه رأي تامر الانسان في تامر الفنان؟
رغم ان أغلبهم لا يمتلك ثقافة كافية ،ولا ذكاء اجتماعي ولا حتى حس انساني،
وده ظهر جدا في موقفهم من الثورة
أنا مش بهاجم حد على موقفه ورأيه ،لكن المسألة هنا مش مجرد رأي
الناس دي وضح انهم منفصلين عن الجماهير ،مش عارفين مين اللي في الميدان
مش فاهمين الشعب -رغم انهم بيدعوا انهم بيعبروا عنه-
مش مطلوب نعاقبهم ،لكن مطلوب نضعهم في أماكنهم الصحيحة
ليسوا نجوما ،ولا يعبرون عنا
كل واحد فيهم بيعبر عن نفسه وعن رأيه فقط
ياريت نحترم التخصص ،كل واحد نسأله عن اللي بيعرفه
مدرب الكرة حيفيدنا قوي لو سألناه في تخصصه ،لكن أكيد رأيه في القضية الفلسطينية حيكون زي أي انسان عادي ويمكن أقل
الممثل حيفهم قوي في الأفلام والمسرحيات لكن رأيه في الدستور هو رأي شخصي ماينفعش يكون مجال لحديث اعلامي
المطرب أكيد مش حيفيدني في فهم ظاهرة الاحتباس الحراري
ياريت الاعلام يبطل يصنع نجوم من ورق ويهتم بالبحث عن الحقائق ومعرفة ما يهم الجماهير وما يمكن أن ينفعه
8مارس 2011
ليست هناك تعليقات:
إرسال تعليق