جيل التغيير مش متربي
فكرت ايه اللي يخلي الولاد دول يعملوا كده ؟
ايه موضوع الغضب والمظاهرات وايه اللي حصل؟
لقيت السبب انهم مش متربيين
مااتربوش على القهر والكبت
ما اتعودوش على تحمل الظلم وما وجدوش أقصى متعة في مجرد الشكوى من الألم
الجيل ده ما راحش مدارس الحكومة ،مش شرط يكون في مدارس خاصة أو أجنبية ،لكن حتى المقيد في مدارس الحكومة ما بيرحش ،ماجربش قهر المدرس ،ولا خاف من أودة الفيران ،المدرس هو اللي راح له البيت
الأب والأم مشغولين في توفير لقمة العيش،أو الجري وراء المزيد من زخرف الحياة
وده طبعا من حسن حظ الجيل ده
من حسن حظهم اننا فشلنا في نقل ضعفنا وسلبيتنا لهم
من حظهم اننا ما نقلناش ثقافة التواكل والسؤال الاستنكاري الأزلي:هو انتو اللي حتغيروا الكون؟
الشباب ده ارتفع عننا كتير
سبقنا وتخطانا بمراحل
كل واحد فيهم حس قد ايه هو كبير
قد ايه ان الفرد ممكن يكون مجموعة والمجموعة ممكن تكبر لما توصل ملايين الأفراد
قرروا يفتحوا الباب ماخافوش من المارد اللي ممكن يكون متربص لهم وراه
ماقالوش اللي نعرفه أحسن من اللي مانعرفوش لأن عندهم الرغبة في معرفة كل شئ
أرجوكم ارفعوا أيديكم عن هذا الجيل
8مارس2011
ليست هناك تعليقات:
إرسال تعليق