اعذروني، مش حاتكلم في السياسة .....مش حاكتب عن السياسة ....لأني في الحقيقة مش مهتمة بالسياسة
مش مهتمة بالحكومة ومين الوزير اللي اتغير ،مين جه ومين راح ومين حلف اليمين ...مين صادق ومين كاذب
ماليش علاقة بمجلس الشعب مين كسب ومين خسر ومين حيعيد
ولا بالأحزاب :لا اليميني ولا اليساري ولا الديني ولا العلماني
عايزين يغيروا الدستور ؟ يغيروه أو حتى يلغوه أكيد مش حيفرق عندي
مش مهتمة بانتخابات المحليات ولا القانون اللي حينظمها
أسرتي الصغيرة أهم ،عايزة ولادي يتعلموا كويس ،يدخلوا مدارس تعلمهم صح ، مدارس مصرية أقدر على مصاريفها ،ومن غير دروس خصوصية
عايزاهم يدخلوا كليات يتعلموا فيها مش ياخدوا منها شهادة
عايزاهم لما يتخرجوا يشتغلوا في أماكن تحترم تخصصهم وقدراتهم
"مش عايزة أخاف عليهم من صاحب منصب أو نفوذ أو"حالة فردية
مش عايزاهم يدفعوا رشوة علشان ياخدوا حقهم
عايزاهم يشربوا ميه نظيفة وياكلوا أكل صحي
واذا مرضوا يلاقواعلاج حقيقي وفي حدود امكانياتهم
مش عايزاهم يخافوا يدخلوا قسم شرطة أو يقفوا قدام قاضي
....باختصار عايزة حقي وحقهم
نشر بموقع الطريق 4 يونيو 2016
نشر بموقع الطريق 4 يونيو 2016
أنتي عايزة وغيرك عايز ،، نتمنى ان تحصلي على ذلك
ردحذف